९ हरदड़ै रो हरियो चोर

आपणी भाषा-आपणी बात
तारीख- ९/३/२००९

हरदड़ै रो हरियो चोर,

खोलै खिड़की बोलै मोर

बहुमुखी प्रतिभा रा धणी राजूराम बिजारणियां रो जलम 7 अगस्त, 1982 नै लूणकरणसर तहसील रै मोटालाई गांव में हुयो। महर्षि दयानंद विश्वविद्यालय, अजमेर सूं एमए राजस्थानी रा स्वर्ण पदक विजेता। बाल-साहित्यकार, पत्रकार, चित्रकार, अभिनेता अर गायक। राजथानी री कई फिलमां में अभिनय। राजस्थानी अकादमी समेत मोकळै संस्थानां सूं सम्मानित-पुरस्कृत।

-राजूराम बिजारणियां

'गु़डायदे, चिबले, मार अमाड़ो, चाल पिदीड़ा, ठारनाख अर वाह खब्बू़डा वाह!' जे़डै कितरा ई बोलां री रम्मक-झमक फागण रै आं दिनां में हरेक गाँव-गळी- गुवाड़ में आपरो रंग दिखावै। आ रिमझोळ निगै आवै हरदड़ो खेल रै रसिया में। संस्कृति अनै संस्कारां री साख भरता ग्रामीण खेलां रै खजानै रो ओ एक सांतरो मोती। टाबर तो टाबर, बू़ढा-बडेरा ई बालपणै रै चितरामां में हब्बाबोळ हुयोड़ा। घणै जोस सूं हुंकार भरै। इण विरासत नै परोटै-टंडवाळै। अडबळी, खटकण, हिंगदड़ो इत्याद कई नावां रै धणी इण खेल रै वजूद नै बचावण री जुगत पण बरकरार।
स्योरात रै पावण दिन सूं इण खेल री सरूआत। अर होळी रै सैं दिन तांई इण री धमक परवान चढै। खेलती बेळा मंड्या पाणा किणी रणभोम सूं निजोरा निजर नीं आवै। खेल सरू हुवणै सूं पैलां दो पाणा मंडै। बराबर-बराबर भीरू बंटै। खेल सरू हुवै। दो ठीयां (इंर्ट या भाटां) पर बाँस री बळी मेल'र पूर री दड़ी सूं बळी नै गु़डावण रो सिलसिलो सरू व्है। हारयोडै पाणै रा गळ गलयोड़ा (आऊट हुयोड़ा) भीरू पिदाई चुकावै। जीत्योड़े पाणै रो एक-एक खिलाड़ी बारी-बारी सूं अमाड़ा लगावै। पीदण वाळा दड़ी नै एक ही ठोकर में जे पाछी पाणै में पुगाय देवै या दोनूं हाथां सूं चिब लेवै तो सा'मलो अमाड़ा लगाय रैयो खिलाड़ी उतर जावै। अमाड़ो लाग्योड़ी दड़ी जे खबियै हाथ सूं चिब लेवै तो सगळो पाणो ही गळ जावै अर हरदड़ो फेरूं नूंवै सिरै सूं सरू हुवै। जीत्योड़े पाणै रो कोई भीरू गळै नीं तो बो घी रो घड़ो गिणीजै।
इण बगत खिलाड़ी खेलता-खेलता आपरा सुर भी काढ़ता जावै-

'हरदड़ै रो हरियो चोर, खोलै खिड़की बोलै मोर।'

हरदड़ो मौज-मस्ती, भाईचारै अर आपसी मेळ-मिळाप रो प्रतीक। होळी मंगळावै तो साथै ही हरदड़ै नै ई मंगळा परा फेरूं अगलै बरस री स्योरात ताईं अडबळी सूं करै राम-राम।

आज रो औखांणो

खेल खेलारां रा, घोड़ा असवारां रा।

खेल खिलाड़ियों के और घोड़े सवारों के।

किसी भी काम में सफलता निपुण व्यक्ति को ही मिलती है।