२१ भंवर म्हानै बोरिया भावै

आपणी भाषा-आपणी बात

तारीख- २१/३/२००९

भंवर म्हानै बोरिया भावै

-प्रहलाद राय पारीक

सिरजणहार धरती सिरजी। आभो सिरज्यो। नदी, पहाड़, समंदर सिरज्या। रूंख, पानड़ा, बेलड़ी, कीड़ी, मकोड़ा, सांप, गोयरा, अजगर सिरज्या। पांख-पंखेरू सिरज्या। हाथी, घोड़ा, ऊंट, बांदर, बनमाणस सिरज्या। पण मिनख री सिरजण अणूंती कळा। सिरजणहार मिनख नै आपरी सगळी सगती सूंप सिरजक बणायो। अब बो मिनख सिरजै भांत-भांत री कळावां। भांत-भांत री चीजां। भांत-भांत री बातां।
मिनख लोक नै सिरज्यो। लोकभाषा सिरजी। संस्कृति अर संस्कार सिरज्या। देई-देवता, भोमिया-पित्तर, पीर-पैगम्बर सिरज्या। संस्कारां नै थिर राखण सारू सिरज्या लोकगीत। मिनख रै पेट पड़नै सूं लेय'र मरणै तक रा सगळा संस्कारां, रीत-रिवाजां, मंगळ-मौकां रा गीत। आं गीतां री सरसता मिनखां में उमंग भरै। एक-एक बोल थाकेलो हरै। मरियोड़ा मन जीवंत करै। जद ई तो पीढ़ी दर पीढ़ी कंठ सूं कंठ लगोलग ऐ गीत गूंजबो करै।
मिनख रै पेट पड़नै सूं लेय'र नव म्हीनां तांईं रा गीत 'हूंस रा गीत' बाजै। लुगाई री सारथकता मां बणनै में ई मानीजै। लुगाई रो भी ओ सै सूं मोटो सपनो। इण सारू पेट मंडाण रै सागै ई उणरै मन मांय सिरजण रो उछाव पांगरै। इणी उछाव में बा जापै री पीड़ रो सामणो करण सारू त्यार व्है जावै। इण वेळा गाइजण वाळा गीत भी उण में मोकळी ताकत भरै। आं दिनां लुगाई में डीलगत अर मनगत बदळाव आवै। न्यारी-न्यारी चीजां खावण री मनस्या हुवै। आं बदळावां रो बखाण लोकगीतां मांय बड़ो सोवणो अनै मनमोवणो। हूंस रा गीत घेवर, कैर, बोर, मतीरो, पड़वाळियो आद नांवां सूं जाणीजै।

लाल पिलंगड़ो पिछोकड़ै, सूती जे कोई बूझै बात
भंवर म्हानै बोरिया भावै।

घेवर री हूंस रै गीत मांय दस म्हीनां में री न्यारी-न्यारी हूंस रो जिकर आवै-

पैलो मास'ज जच्चा राणी नै लागियो
म्हारो मन पड़छायां जाय।
म्हारो मन हरख्यो घेवर में।
आ तो हूंस भली छै घर री नार
थारो सुसरोजी पुरावै ओ राज
म्हारो मन हरख्यो घेवर में।

आज रो ओखाणो

कूख सूं जायोड़ो सरप ई मां नै वाल्हो लागै।

कोख से जन्मा साँप भी माँ को प्रिय होता है।

मां की कोख से बदमाश, लंपट व शैतान ही क्या,
यदि साँप भी पैदा हो जाय तो वह उसे प्यार करती है।

मां की ममता का कोई पार नहीं।