१६ तनै क्यांगो सांसो खाग्यो रे

आपणी भाषा-आपणी बात
तारीख- १६/३/२००९

तनै क्यांगो सांसो खाग्यो रे

छोरा रामधनिया

-सत्यनारायण सोनी

लोकजीवण में हाथ सूं काम रै साथै जबान सूं राम रटण री सांतरी परम्परा। आ परम्परा 'रामभणत' रै नांव सूं जाणीजै। लावणी री वेळा तो आ परम्परा पूरै जोबन पर होवै। इण परंपरा में लोकगीत अर लोकभजनां री गूंज होवै। पण नूवी पीढ़ी इण सूं अणजाण।
किरसाण रै जीवण में रामभणत री महताऊ ठोड़ । एक बगत हो कै लोग-लुगाई घर-बार, खेत-खळै, कुवै-बावड़ी माथै काम करता तो भगवान रो नांव नीं भूलता। दिनूगै मा-बैणां चाकी झोवती, दही बिलोवती अर फूस बुहारती भजन गुणगुणावती। खेतां में हाळी हळ चलावता, निनाण करता, लावणी करता, कुवै रा माळी माळीपो करता अर पाळी एवड़ चरावता 'रामभणत' करता सुणीजबो करता। जेठ-असाढ़ में बिरखा री झड़ी लागती। किरसाण बळदां-ऊंटां नै सिणगारता। खेतां में हळ जोड़ता अर गांवता-

लाग्यो-लाग्यो जेठ-असाढ़ कंवर तेजा रे
लगतोड़ो तो लाग्यो रे सावण भादवो।.....

इण वेळा गायीजण वाळा गीतां में एक गीत इण भांत भी है- 'आभो धरर्रायो ओ म्हारी लाल नणंद बाई गा बीरा आभो धरर्रायो.... किन्नै धरर्रायो ए म्हारी सदा सुरंगी नार, किन्नै धरर्रायो।' इणी भांत लावणी मतलब फसल कटाई करती वेळा थकेलो अर जोस भरण सारू सगळा मिलनै गावै। गावै तो काम में फुर्ती बापर जावै। गीतां सूं पैली लांबी राग में जोसीला दूहा बोलीजै जिणनै सिंधु़डो लगावणो कैयीजै। एक मिनख जीवणै कान में आंगळी घाल ऊंची राग में दूहो बोलै अर कमतर करता दूजा लोग 'स्याबास! स्याबास! बोलै। एक सिंधु़डो इण भांत है-

राम खुदाई रामसर, लिछमण बांधै पाळ।
सीता ढोवै टोकरी, है रामचंदर गी नार।।

अब राजा रामचंद्र रो परवार इतरो काम करै तो आपणै आंट काइं! एक जणो गीत गावै। दूजा लोग लारै-लारै बोलता काम करता जावै। झांझरकै सूं लेय'र सौपै तांईं इकलार चालै ओ रूणक-मेळो। फुर्ती अर जोस बधावै, मरता मिनखां नै जीवाड़ै ऐ गीत। ऐड़ो ई एक लोकगीत-

तेरी जोड़ी जुग में थोडी रे छोरा रामधनिया,
तेरी जोड़ी आछी मेळी रे छोरा रामधनिया,
तनै क्यांगो सांसो खाग्यो रे छोरा रामधनिया,
तूं काळो किण विध पड़ग्यो रे छोरा रामधनिया।

आं गीतां में भाभी-देवर री ठिसकोळ्यां भी चालै। भाभी आपरै देवर नै टूम घड़ावण सारू नीं कैवै। वा तो एक जबरो सो दांतियो घड़वावण री पुकार करै- 'भले, खे़डी गो घड़वा दे रे देवर मेरा असली दांतियो, बींडो तो लगवा दे चन्नण काठ गो, फूली तो लगवा दे रे देवर मेरा बीजळ सार गी, घुघरिया लगवा दे रे देवर रिमझिम-रिमझिम बाजणा।'
आथूणा संस्कारां अर रीति-रिवाजां सूं आंधो मोह लीलतो जावै आपणी प्यारी-प्यारी परम्परावां। खेती में मसीनां रै बधेपै सूं भी आज आ परम्परा मोळी पड़ती जावै। भलां ई आ परम्परा लोप व्हैती जावै पण इण परम्परा रो सांस्कृतिक अर सामाजिक मोल बिसारयो नीं जा सकै।

आज रो औखांणो

कमाऊड़ै नै घी, खाऊड़ै नै दुर छी!

कमाने वाले को घी, खाने वाले को छी-छी!

कमाने वाले का सर्वत्र सम्मान होता है और उड़ाने वाले को सभी अवज्ञा की नजर से देखते हैं।