Saturday, May 9, 2009

१० मां जिसो मंतर नहीं, अन्न जिसो न औखद

आपणी भाषा-आपणी बात
तारीख- १०//२००९

मां जिसो मंतर नहीं,

अन्न जिसो न औखद

मां कैयां मूंडो भरीजै। मां सूं आछो कीं कोनी जगत में। सुख में-दुख में, हर घड़ी जको टप्पो आपोआप कंठा नीसरै, बो है- 'मां'। माय, माऊ, मात, माता, मावड़ी, अम्मा, जामण, जणनी इणरा ई नांव। हेजळी अर रातादेई जिसा कित्ता ई विशेषण। आपणी भाषा रै औखांणां में इणरो जिकर अणथाग। मां आप मारै, पण किणी नै मारण नीं देवै। मां आवै दही-बाटियो लावै। मां करै सो धी करै। मां खेत में अर पूत जनेत में। मां गैल डीकरी, घड़ा गैल ठीकरी। मां गैल बेटी अर काठ गैल पेटी। मां, घोड़ा री पूंछ पकड़ूं कांईं देसी, कै घोड़ो मतै ई दे देसी। मां जिसो मंतर नहीं, अन्न जिसो न औखद। मां डाकण कै वेळा डाकण। मां डाकण, तो ई आपणी। मां तो एक मां है। मां तो फगत जलम देवै, करम नीं। मां तो भटियारण अर बेटो फतै खां! मां, दो कवा है, एक थूं खायलै अर एक म्हैं खायलूं, कै नीं बेटा, दोनूं थूं ई खायलै। मां नीं अर नीं मां रो जायो, देसड़लो परायो। मां-बाप मरग्या अर इणी घर री करग्या। मां-बाप मेवा रो रूंख। मां बिना कै़डो मांमाळ, सास बिना कै़डो सासरो! मां बेटी रो रीसणो अनै मोठां रो पीसणो। मां मरै जिणरी मासी पैलां मरै। मां मां, गुळ री भेली लावूं ऐ, कै थारी कड़ियां री लांक ई कैवै। मां मां, मामा आया, कै भाई तो म्हारा ई है। मां मां, माखी ऐ, उडा दे बेटा, कै दो है। मां मां, मोटो व्हियां बामण ई बामण मारस्यूं, कै राम करै मोटो व्है ई ना। मां मां, म्हैं भाजूं जबरो ऐ, कै काकी रो जायो नीं मिल्यो जित्तै ईज। मां, म्हैं स्यांमी हो जास्यूं, कांईं जोर आयो, लखपति व्है तो जाणूं! मां रै पेट में कुण ई सीखनै नीं आवै। मां री गाळियां, घी री नाळियां। खावणो मां रै हाथ रो, हुवो चायै जहर ई। मां री मार अनै बाप रा बोल बराबर। मां री मार में लागै थोड़ी पण हाको घणो। मां रै सगळा टाबर इकसार। मां रै हाथ री हांडी तो बाप रै हाथ री मोगरी। मां रो जीव तो सदावंत सिरै। मां रो जीव धीणा में। मां रो दूध मोल थोड़ो ई मिलै। मां पर पूत, पिता पर घोड़ो, घणो नीं तो थोड़म-थोड़ो। मां संपणी तो ई अपणी। मां सूं पूतां रा उणियारां कांईं छांना। आपणी भाषा में मां सारू इत्ता औखांणा कै मत बूझो बात! ऐ बांच्यां है तो आपनै कीं और भी याद आया हुसी। पुगावो दिखांण।
साहित्यकार शिवराज भारतीय (नोहर) री बैठक मांय वां री मां रो फोटू। अर फोटू सागै है आ कविता। रचणहार खुद शिवराज भारतीय। बांचो सा!
लाड-कोड रो समंदर मां,
मो' ममता रो मिंदर मां।
चोखी-चोखी बात सुणावै,
लोरी गा'र सुआवै मां।
धमकावै अळबाद करां जद,
रूसां जद बुचकारै मां।
मां कै'यां मुंडो भर आवै,
हियै हेत सरसावै मां।
मिनख भलांई हुवै डोकरो,
उणनै समझै टाबर मां।
सगळा तीरथ-धाम उठै ई
जिण घर हरखै-मुळकै मां
मां री होड करै कुण दूजो
परमेसर भी पूजै मां।

1 comment:

  1. मातृ दिवस की हार्दिक शुभकामनाऐं.

    ReplyDelete

आपरा विचार अठै मांडो सा.

आप लोगां नै दैनिक भास्कर रो कॉलम आपणी भासा आपणी बात किण भांत लाग्यो?