Saturday, December 25, 2010

सिमरथ रो सियाळो

गरीबियै री गरमी,

सिमरथ रो सियाळो

-रामस्वरूप किसान



धोरां री धरती पर पाळो उतरयो । गे़ड चढ्यो। बूढै-बडेरां रा हाड कांप्या। आठूं पौर एक ई रट। आज तो भोत रट्ठ पड़ै। कोझी रीळ चालै। उतरादी डांफर है। बंचगे रईयो टाबरो! पण टाबर तो कूदता फिरै। बां रो तो पाळो बकरिया चरै। माल्ला तो बूढियां रै मंडग्या। खड़्यै दिन रिजाई में बड़ै अर भातै जाय'र किरड़ै री भांत नाड़ बारै काढै। पाळै में किरड़ै अर बूढै री एक गत। चौमासै रो सतरंगो किरड़ो पाळै में इकरंगो बणै। काळो मूराड़। सत बायरो। लकड़ी में घाल किन्नै ई बगाद्यो भांवूं। हालै ई कोनी। फगत आंख काढ़बो करै हंगायै पाडै दां। एन ओ ही हाल बोदियां रो। कैबा चालै- टाबर नै म्हैं पालूं कोनी, जुवान मेरो भाई, बूढियै नै छोडूं कोनी, भावूं ओढै सात रिजाई।
पण जुवानां रो हाल सूं उल्टो। बां नै ओ पाळो मीठो लागै। मिसरी रै उनमान। नूंवो खून। पाळै नै कां दिवाळ। बै तो कोढियै रट्ठ सूं आणंद काढणो जाणै। सांप रै फण सूं मिण काढणी आवै बां नै। सारू बै इण पाळै रो मजो लेवै। सियाळै री लाम्बी रात रो सुख लूटै।
सियाळो जोरावर रो साथी पण निजोरै रो बैरी। कैबा है- गरीबियै री गरमी, सिमरथ रो सियाळो। पाळै में गरीब में फोड़ा ढंगसिर गाबो जुड़ै नीं। जूती जु़डै नीं। अर ना सोवण नै बिछावण। पाळै रो असली दु:ख तो पोह री रात में फुटपाथ पर सूत्या जाणै बापड़ा। पण इण में पाळै रो कां दोस! ओ दोस तो है जिकां रो ई है। पाळो तो पाळो ई है बापड़ो। परकरती रो लाडलो। जकै रो एक न्यारो ई फुटरापो हुवै। ओ रुत रो पातस्या नीं तो बजीर जरूर है। रुत में खाणै-पीणै अर पै'रणै-औढणै रो न्यारो ई सुवाद। लोग जमावणो जमावै। पींडिया खावै। खोवो काढै। गाजर-पाक बणावै। घी-दूध खाणै रो ई ईं रुत में मजो है।
आ रुत मरु रै सांवळै गात नै गौरो कर नाखै। उन्याळै अर चौमासै में तलीज्योडो आदमी रुत ईं में टंवरा काढण लागै। उण रै हाडां चामड़ी आवै। क्यूँ के ना गरमी ना तावड़ो। ना ऊमस ना झळ। सो' कीं सीतळ ई सीतळ। जकै में ना माखी ना माछर। ईं वास्तै नां चिरमिराट ना झरळाट। ना खुजली ना खाज। अर ना ई आवै पसेव। डील पड़्यो रैवै पोथी जिसो। अर ओ पोथी जिसो डील पाळै री लुज्जत लूटै। गाबां में गुरक होय'र चूंतरियां पर हथाई करै। होका सुरड़ै। बातां रा बडका पाड़ै। मुंह री भाप बारै काढै। अर घणो पाळो हुवै तो धुंई बाळै। जकी रै च्यारूंमेर बैठ हथाई जोड़ै क्यूं ? पाळै रा है नीं मजा। अर सोवण बगत सोड़ियै-रिजाई में बड़'र बां नै ताता करै। रिजाई नै च्यारूंमेर सूं दाब'र भीतर रो मौसम मन-माफक बणाल्यै। अर पछै लेवै मीठा-मीठा सुपना।
अर अबार बांचो पोह-माह म्हींनै सारू लोक चलत रा ऐ दोय दूहा-

उगमियो उतराध रो, नवजोबन संजोग।
पोस महीनै गोरड़ी, कदै न छंडै लोग।।

माघ महीनै सी पड़ै, तिण रुत चलै बलाय।
ऊंडै पड़वै पोढबो, कामण कंठ लगाय।।

5 comments:

  1. thaari rachna ro sheershak hi apne aap maany saari baat kah dye hai. suni rachnaa...........

    ReplyDelete
  2. मौसम मन-माफक...................वाह जी....बहुत बढ़िया

    ReplyDelete
  3. चोखी पोस्ट भाई जी
    बुढा नैं xxx रा तीन पै दयो सियाळों आपै भाग जासी।:)
    म्हारे अठै भी जाडो घणो पड़ रहयो है म्हे तो अंय्या ही ई नै भगावां हां

    राम राम

    ReplyDelete
  4. jai ho...............

    bahut shaandar post !

    ReplyDelete
  5. सर्वे भवन्तु सुखिनः । सर्वे सन्तु निरामयाः।
    सर्वे भद्राणि पश्यन्तु । मा कश्चित् दुःख भाग्भवेत्॥
    सभी सुखी होवें, सभी रोगमुक्त रहें, सभी मंगलमय घटनाओं के साक्षी बनें, और किसी को भी दुःख का भागी न बनना पड़े .

    नव - वर्ष 2011 की हार्दिक बधाई एवं शुभकामनाएं !

    -- अशोक बजाज , ग्राम चौपाल

    ReplyDelete

आपरा विचार अठै मांडो सा.

आप लोगां नै दैनिक भास्कर रो कॉलम आपणी भासा आपणी बात किण भांत लाग्यो?